ចិន៖ សម្ព័ន្ធសាខាឱសថជាតិចិន (Sinopharm) ដែលមានមូលដ្ឋាននៅទីក្រុង Wuhan បានអះអាងថា ការចាប់ផ្តើមដំណើរការនូវរោងចក្រផលិតវ៉ាក់សាំងថ្មី នឹងអាចជំរុញនូវសមត្ថភាពបង្កើនការផលិតវ៉ាក់សាំងប្រឆាំងកូវីដ-១៩ របស់ខ្លួនបានរហូតដល់ចំនួន ១ពាន់លានដូសក្នុងមួយឆ្នាំ។ នេះបើតាមសេចក្តីថ្លែងការមួយកាលពីថ្ងៃចន្ទរបស់វិទ្យាស្ថានផលិតផលជីវសាស្រ្តទីក្រុងវូហាន ប៉ុន្តែយ៉ាងណាក្តី គេមិនទាន់ដឹងថា តើរោងចក្រទាំងអស់ដែលនឹងជំរុញសមត្ថភាពផលិតវ៉ាក់សាំងបានច្រើនសម្បើមបែបនេះ នឹងអាចដំណើរការពេញលេញនៅពេលណាឡើយ។

យ៉ាងណាក្តី ការប្រកាសនេះក៏នឹងជំរុញឱ្យក្រុមហ៊ុន Sinopharm កាន់តែខិតជិតដល់គោលដៅរបស់ខ្លួនដូចគ្នា ខណៈដែលកន្លងមក Sinopharm ធ្លាប់បានប្រកាសថា នឹងជំរុញការផលិតឱ្យបានរហូតដល់ ៣ពាន់លានដូសក្នុងមួយឆ្នាំ។ ក្រៅពីនេះមូលដ្ឋាននៅទីក្រុង Wuhan វិទ្យាស្ថានផលិតផលជីវសាស្រ្តក្រុងប៉េកាំង ដែលជាសម្ព័ន្ធមួយទៀតក្នុងការទទួលការផលិតវ៉ាក់សាំង Sinopharm នឹងបានការទទួលស្គាល់ពីអង្គការសុខភាពពិភពលោកកន្លងមក ក៏មានសមត្ថភាពក្នុងការផលិតបាននូវវ៉ាក់សាំងប្រមាណជា ១ពាន់លានដូសក្នុងមួយឆ្នាំដូចគ្នា ថែមទាំងកំពុងសាងសង់នូវរោងចក្របន្ថែម ដើម្បីបង្កើនប្រសិទ្ធិនូវសង្វាក់ផលិតកម្ម ក្នុងការផ្គត់ផ្គង់បន្ថែមទៀត។ 

កន្លងមក ចិនបានប្រកាសទទួលស្គាល់នូវវ៉ាក់សាំងកូវីដ-១៩ ចំនួន ៤ប្រភេទពីរោងចក្រក្នុងស្រុករួមមាន Sinopharm, Sinovac Biotech Ltd និង CanSino Biologics Inc សម្រាប់ការប្រើប្រាស់ជាសាធារណៈទូទៅ និងវ៉ាក់សាំង ៣​ប្រភេទទៀតសម្រាប់ការប្រើប្រាស់ក្នុងលក្ខខណ្ឌបន្ទាន់។ ចំពោះប្រភេទ SinoVac ដែលមានលទ្ធភាពផ្គត់ផ្គង់វ៉ាក់សាំងចំនួន ២ពាន់លានដូសក្នុងមួយឆ្នាំនោះ បាននិយាយកាលពីថ្ងៃអង្គារថា ក្រុមហ៊ុនខ្លួនបានផ្គត់ផ្គង់វ៉ាក់សាំងសម្រាប់ការប្រើប្រាស់ក្នុងស្រុក និងជុំវិញពិភពលោកប្រមាណជា ៦០០លានដូសហើយ គិតត្រឹមចុងខែឧសភានេះ៕